Ràdio Occitània, qu'es aquò ?

Ràdio associativa, nascuda en 1981 a Tolosa, la tòca nòstra es la promocion de la lenga e de la cultura occitana sens doblidar la mosaïca culturala venguda dels 5 continents e presenta en Miègjorn-Pirenèus (Africa, Antilhas, Bulgaria, Catalonha, Espanha, Magrèb, Portugal, Reünion, U.S.A, Vietnam…)

Realizam e difusam 24 oras sus 24 de programas pròpris completament o en partida en Occitan, tractan de mantun subjècte : Economia, Politica, Espòrt, Literatura, Cinèma, Sciéncia, Novèlas Tecnologias… botan atal un lum occitan sul mond.

En Miègjorn-Pirenèus, mantuna ràdio associativas prepausan de programas en lenga occitana, en Arièja, Tarn, Tarn e Garona, Òlt e Avairon. Çaquelà, i a pas que doas ràdios que difusan aquela mena d'emissions, a mai de 60% de lor grasilha : son Ràdio País a l'oèst, de l'Atlantic a Garona, e Ràdio Occitània dins lo parçan de Tolosa, en Comenge e en Lauragués.

Ràdio Occitània difusa cada jorn, 10 rendètz-vos d'informacions regionalas, euròregionalas, nacionalas, e internacionalas en Occitan en fasent veire atal lo caractèr actual e viu de la lenga dels Trobadors.

Las Chifras

Segon un estudi sociolingüistic, realizat en 2010 per la Region Miègjorn-Pirenèus, l’Occitan es parlat per 18% de la populacion e comprés per 32% sul territòri regional.

En çò de las personas interrogadas, 93% considèran que la lenga occitana far part integranta de la cultura de Miègjorn-Pirenèus, 75% son en favor de son ensenhament, e 62% son favorablas al refortiment de sa preséncia dins los mèdias.

Se n'en volètz saber mai, l’integralitat de l’estudi es disponibla aquí.

Un recent sondatge Médiamétrie fach sus la ciutat mondina, que los resultats afortisson los de las annadas passadas, balha a l’estacion nòstra las chifras seguentas :

  • Auditòri Costumièr : 1,2%
  • Auditòri Setmanièr : 3,1%

Reportat a l’ensemble del bacin de populacion concernit per la difusion de nòstres emetidors (1.350.000 estatjants), aqueles percentatges balhan los resultats seguents :

  • Auditòri Costumièr : 17.000 Personas
  • Auditòri Setmanièr : 42.000 Personas

Nos escotar en FM

País Tolosan

98.3

Comenge

89.4

Lauraguès, Nòrd-Arièja

106.1

Roergue

93.6